يا ريته كان قتلنى ...!
اكتب تلك الكلمات وقد مرت سويعات بسيطة على هزة كسرتنى وأفقدتنى الثقة فى كل شئ ... كل شئ .... فقد أهدرت كرامتى على مسمع ومرئى من شعبنا الكريم ذو الكرامة ذو الحضارة ... صاحب الثروة ... اقصد الثورة التى يعتبرها غالبية شعبنا مصدر الخراب على البلاد .... ساحاول ان اتمالك اعصابى واحبس صوتى الذى بح مع صرخات الغوث وان اتمسك بدمعاتى حتى لا تحجبنى رؤية ما اكتب فلعلها مثل شعبنا العظيم تريدنى ان اصمت الى الابد ... سأسرد ما حدث بالعامية حتى استطيع ان اعكس تلك اللحظات المنحطة :
انهارده بعد يوم شاق وانا راجعة البيت وراكبة المترو فى عربية السيدات قصدى السيدات .... كنت قاعدة وراكنة راسى عالحيط من كتر التعب والارهاق وكل شويه الاقى باعة متجولين ودى ظاهرة انتشرت فى الايام دى كتير وكنا بنستحملهم لما بيطلعوا عربية السيئات وبنقول اهو بدل ما يسرقوا ودى لقمة عيشهم واحوال البلد مش هيا ... المهم فى منتصف الطريق ... وللعلم انا كنت راكبة خط المرج ... وتقريبا فى محطة غمرة او الدمرداش انا مش فاكرة لانى مش بركز فالمحطات لانى بنزل اخر الخط ... طلع راجل عنده حوالى ستين سنة مربى ذقنه وماسك عصاية مقشة مكسورة ( نص عصاية ) وبدأ يوعظ الناس بصوت خرم ودانى ... انا محاولتش اركز فكلامه لانى تعبانة جدا وقولت اكيد هينزل المحطة الجاية وعدت محطة واتنين وثلاثة واربعة ولسه بيخطب ... انا تعبت نفسيا لان كلامه غلط وبيوصل للناس معلومات غلط وبيتكلم باسلوب مهين للسيئات اللى قاعدين يعنى بيقولهم ان معظم اهل النار من النساء لان كل واحدة فيكم مش بتحرم نفسها وعمال يشوح بالعصاية ... والمصيبة مش فيه .. المصيبة انه فى ستات وبنات بتستجيب ليه .... كل ده وانا ساكتة ... بصيت فعيون كل السيئات اللى حوليا لقيت منهم اللى مش فبالها واللى حاطة الهاند فرى واللى نفسها تقوله انزل مالعربية ومش قادرة ودول مش كتير واللى فرحانة بالجرائم اللى بيقولها ... فقررت اقول لاء ... قمت وندهت عليه وتقريبا عمل نفسه مش سامعنى فعليت صوتى ... لو سمحت يا عم الشيخ ... دى عربية السيدات ومينفعش تركب فيها وثانيا اللى انت بتعمله ده مكانه المسجد واى واحدة عاوزة تعرف عن دينها عندها المساجد او التلفزيون ... لقيت الستات اللى فالمترو بتقولى وانتى مالك احنا عاوزين نسمعه لو مش عاجبك انزلى ده فنفس الوقت اللى هو بدأ فيه يشتمنى بالفاظ بذيئة ..مرديتش عليه ورديت عالسيئات قولهم لاء ده كده قطع للطريق .... المترو ده وسيلة للنقل وليس مكان للدعوة ولو انتم عاوزين تسمعوه خدوه وانزلوا ... المهم لقيت الراجل بيقرب عليه وهو بيشتم .. فقولتله احترم نفسك والا هبلغ الشرطة وطلعت الموبايل فايدى ولسه بضرب الرقم لقيته نتش منى الموبايل وهو مازال يقذفنى بسيل من الشتائم ... قلتله متشتمش لو سمحت وهات الموبايل هاااااااااااااات الموبايل ... راح باقصى قوة رازع الموبايل عالارض .... فصرخت ووطيت اجيب الموبايل وهو لسه بيشتم لقيته بيضربنى بالعصاية على راسى وعلى كل جسمى ولما وقفت طعنى بالعصاية فرقبتى وانا بصرخ انا عاوزة الشرطة حد يمسكه انا لازم اوديك الشرطة والقيت سد اسود من المنتقبات بيحشونى عنه وبيقولولى انتى غلطانة وانتى مالك بيه ده رجال اد ابوكى ... قولتلهم معلون ابويا وانا بصرخ سيبونى وهما ماسكنى وبيحشونى عنه وهو عمال يضربنى بالعصاية على راسى من فوقهم ولما باب المترو فتح ...الراجل جرى ورمى العصاية وانا فلت من اديهم عن طريق بنتين حلال ونزلت جريت وراه وانا بصرخ امسكوه الراجل ده ضربنى والناس بتتفرج كل الصراخ ده خارج المترو مسافة حجوالى عربيتين عشان يروح يركب فعربية الرجالة كل ده والناس بتتفرج الشعب العظيم ... وجريت رواه لحد ما ركب فعربية الرجالة وركبت معاه وانا فى حالة من الانهيار والهيستريا والصراخ امسكوه الراجل ده ضربنى وشتمنى انا عاوزة الشرطة المهم حوالى ثلاث او اربع رجالة من العربية اللى فيها ما يقرب من 100 دكر اللى مسكوه ولقيت الناس متبلدة واحد من ظهرى جاى يقولى هو سرق منك حاجة .. قولتله ضربنى وشتمنى... وانا كنت منهارة .. كرره تانى يعنى مسرقش منك حاجة قولتله بقولك ضربنى ... والتانى جاى يقوللى انتى منين .... والباقى بيقوللى ده راجل اد ابوكى ومعلش فى حين انه اثار الضرب معلمة على رقبتى وهو مازال عمال يشتم .... بدأت الحوارات والمفاوضات داخل العربية واجمع الاغلبية على انه راجل كبير اد ابويا ولازم اسيبه واروح وعادى .... المهم انه مسرقش منى حاجة .... فيما عدا الاربعة اللى صفصفوا على اتنين مسكوا الراجل لحد محطة المرج اللى فيها النقطة ونزلنا مالمترو وهما ماسكينه وواحد جرى راح ينده اى امين شرطة .... والمشهد كان زى ما باحكى ... صحيح فى بنت نزلت معايا من عربية السيدات وقالتلى انا هشهد معاكى بنوتة بالكتير عمرها عشرين سنة ... المهم الراجل قاعد على المقاعد فالمحطة وامين الشرطة الوسيم جه ... في ايه ...قولتله عاللى حصل وانا عاوزة اعمل محضر واخد حقى لقيت الراجل قايم يتهجم عليا وعاوز يضربنى وبيقوللى انا لو معايا مسدس كنت قتلتك يا فاجرة .. قولتله اثبت عندك يا حضرة الظابط ... ولقيت الظابط بيبصلى وكانه بيقوللى انا مش هعملك حاجة ... واللى منع الراجل انه يتهجم عليا الناس اللى كانت واقفة مش الظابط ولقيته بمنتهى الاحترام والحنية بيقوله قوم اتفضل معايا لازم اعمل محضر .. فرفض وقاله انا ظابط قديم ومحدش هيقدر يقبض عليا وانا مش رايح فحته .. قاله تعالى معايا متخافش ( والله باللفظ ) تعالى عشان الظابط اللى هيعمل المحضر فوق مش هنا .. قاله انا مش رايح فحته واللى عاوزنى يجينى كل ده والناس واقفة بتقوللى انا والضابط ده راجل كبير ومينفعش يتبدل ... فرديت باصرار ... يا سعادة الباشا لو مش قبضت عليه عشان اعمل البلاغ انا هبلغ فيك انت شخصيا ... فبصلى بصة المغلوب على امره ؟.... والراجل قام بسهولة جدااااااااااااااااااااااا ركب المترو قلتلهم انتو هتسيبوه يمشى وصرخت فيهم اقبضوا عليه ده مجرم ... ففى شبباب وقفوا ومنعوا الباب الخاص بالمترو انه يتقفل وكان فى مع الضابط معاونين لابسين مدنى قالولوه وقف المترو ... قال المترو مش هيتعطل .... وراح الراجل بدون حتى ما يبعتوا وراه ولو مخبر يقبض عليه .... واخدنى الضابط مكتبه فى صمت تام وقاللى متخافيش احنا هنبلغ فكل المحطات وربنا يسهل .... وبدأت نغمة الترحيب والطبطبة وكانهم بيقولولى قصرى وروحى عشان الليلة خلصت ... ووالضابط ده اختفى ولقتنى بتكلم واحد لابس مدنى معرفش رتبته ... واخدونى على قسم سراى القبة وهناك قابلت اخوانى وليد عبيد ووليد على واحمد ناظم .. ولما اتكلمنا مع المسؤول هناك بدا من كلامه انه مفيش شئ هيحصل وهنجيبه منين والضابط مقبضش عليه عشان ظروف البلد وانتى شوفتى الناس واقفة بتقوله ده راجل كبير ...هو عاوز يقوللى انه كان ممكن يتضرب زيك لو قبض عليه ... ولقيت مأمور القسم نازل مبتسم وبيحاول يدافع هو راخر ولما لقينا كلنا معترضين على كلامه بدأنا فى استقبال موجه من الوجوه الحسنة المبستمة ومكانش ناقص يقولنا انتوا منورين القسم ولما اخويا جه اتعمللوا احلى تشريفة طبعا لانه وكيل نيابة .... وخلص اللقاء مع المسؤولين داخل القسم بعد نقاشات فى وضع البلد تدل على انهم سيكونوا غير قادرين حماية وتأمين الانتخابات ... وحالة من التبلد ... واحنا مش عاوزينك تكونى زعلانه ... قولتلوا انا حزينة ومكسورة وهفضل كده لحد حقى ما يجينى ...
ده اللى حصل
ذهبت الى المنزل مع امى واخى وانا فى حالة انهيار داخلى ....اصرخ... حقيقة... صرخت اللا ان صوتى راح وذهب مع الاستغاثة بالشعب العظيم .. وحين وصلت الى منزلى ولجأت الى غرفتى وكأنى سأجد فيها الامان ونزعت ملابسى لارى جسدى به اكثر من ستة جروح كانت تنزف دون ان اشعر بها وعشرات الكدمات الشديدة.. رأسى مليئة بالتّورمات وبها حرج كان ينزف ... اين الامان ... اين الشعب الذى كان يجعلنى اشعر بان الشارع بيتى والذى حمى المساجد والكنائس .... اين شباب الثورة فى عربة المترو التى اغلب ركابها من الشباب ... أين نفسى التى كسرت وكرامتى التى اهدرت وحقى الذى هدر ... يا ليته قلتلنى ...كنت سارسل له الشكر على قتلى لانه سيرسلنى الى ربى حسيبى وملجأى لانه سيجعلنى اتذوق رحمة الرحيم وعفو الغفو وقوة القوى ونصر النصير واجابة المجيب ...حسبى الله ونعم الوكيل
اقسم بالله ( ع الاقل احساسي بنفسي ) لو كنت موجود مكنتش سيبت حقك انا كنت في المترو طول النهار رايح جاي زي الاهبل وفي نفس الخط بس مشوفتش حاجه من دي يمكن حصلت وانا في مشواري اكيد
ردحذفبس اللي عايز اقولهولك متعمميش ع الشعب
انا متفهم خوف الظابط من الناس اكيد
بس انتي لازم كان يبئا معاكي اكتر من شاهد ويمسكو الراجل ومش عارف ده محصلش ليـــــه
وليـــه محدش صوره عشان يدي الصوره للشرطه تجيبه ؟
أسأله كتيره
انا شخصيا النهارده داخل اشتري هدوم في العتبه
وانا بتفرج ع الفاترينه برا جه واحد قالي ما تييجي تشتري من عندنا احسن
لقيت صاحب المحل طلع جري وراه وطرده
انا حسبت انها غيره بياعه مش اكتر
بس صاحب المحل قالي ده بلطجي لو روحت معاه كان هيسبتك في جنب والكلام ده كله
قولتله فين الشرطه ولا الجيش قالي محدش بئا يحمي حد ولا في شرطه ولا في جيش البلد ضايعه من شوية ( أسف في اللفظ ) خولات ماسكينها
هدي نفسك وحاول تعملي محضر بكره تاني واوصفي شك الراجل وخلي حد متخصص في الشرطه يرسمه ويجيبولك حقك خصوصا ان اخوكي وكيل نيابه زي ما قولتي اخرجي قوليله لو محاولتش تجيبلي حقي لا انا اختك ولا اعرفك
ومعلش بئا يمكن الوقت اللي كنتي فيه والمكان مكنش موجود رجاله بمعني الكلمه
بس ده ميصحش نعمم ع الشعب كله لان زي ما في كده في كده
برغم اللي حصل يعني واللي حكتيه بس خلي عندك أمل وان شاء الله ربنا هيجيبلك حقك في الدنيا وفي الاخري
وانا شخصيا كدكر مصري مكنتش موجود في الحادثه دي
بأعتذرلك عن الرجاله اللي كانو موجودين
وربنا يسهل والبلد تخلص بئا من اللي هي فيه
انتى غلطانه اقولك ليه ببساطه احترمتى شيبته من البدايه ومقلعتيش اللى فى رجلك وضربتيه على وشه ومكنش حد هيقدر يغلطك لانه راكب عربيه السيدات
ردحذفوبعدين المره الجايه اعملى حسابك على برفان من نوع مركز لما يحصل معاكى كده رشيه فى عينه وانزلى فيه ضرب
ولو فى شرطة سلميه مافيش يبقى اخدتى حقك
وحمدلله على السلامه
يانهار ازرق دا ؟؟؟؟؟؟؟ معقول لسة ف كدا جهل وتخلف وتبلد .. يا الله !! البلد هاتتضلح امتي بقي
ردحذفمن اعمالكم سلط عليكم ...كسرتو الشرطة و طالبين امن ...ازاي و 70% من البلد زي الحيوان الي بتحكي علية ...
ردحذفمعلش يا اسماء .. هقولك ايه غير كده يعني
ردحذفانا الاحباط ركبني من ساسي لراسي بعد الي قريته ده
بقينا شعب وسخ وسخ لاقصى درجة ما بين كل 1000 راجل ما ماتلاقيش غير دكر واحد وبالعافية
بقى عندنا ثقافة التبرير
مبارك سرق البلد وقتل الف شهيد هو وداخليته .. نسامحه ده راجل كبير
مسئول غلط في الشعب واستخف بثورتنا .. هو ده لو كان ابوك كنت هتكلمه بالطريقة دي يا ولد
غياب الامن ... ما انتوا الي خدشتوا حيائهم بالثورة
الشعب مصاب بمرض العبودية .. بنعشق العبودية
احا احا بجد احسن كلمة تتقال على الي قريته ده
متضيقيش نفسك يا اسماء انا عارفة الناس الواطية دى اللى تقعد تقولك راجل كبير و خرة و بتوع الشرطة ولاد التيت دول كمان انا مضايقه اوى عشانك و دمى فاير بس معلش ليكى حق و هتخضيه ووعد منى لو ركبت الممترو فى مرو ولقيت الحيوان ده هصوره او لو عرفت اوديه النقطه هعمل كدة ,, قال ايه جاى يقول مواعظ اتفووو على دول و كل حتة فى جسمك واجعاكى احتسبيه عند ربنا و حقك هيجيلك سواء دلوقتى او بعد وقت و مش محتاجه اقولك دعوة المظلوم معلقه بين السماء و الارض خللى بالك من نفسك و ان شاء هتخدى حقك من الراجل الحقير ده و من الضابط اللى عامل فيها خالتى المطيباتيه لان حقك ده حقنا كلنا و الثورة مستمرة
ردحذفبصي يا حبيبتي في حاجات لازم كل بنت تعرفها عشان لو واحد ضايقها تعرف تتصرف
ردحذفمن اول شتيمه شتمهالك كان برجلك وشالوت ف الحته اللى انتى عارفاها وبيضربوها على طول في الافلام صدقيني ممكن يموت فيها.. لو مكتوب له عمر ومامتش هايوطى شويه وكملى كمان شالوت ووببوز جزمتك وفي وشه.. لسه في النفس اقلعي الجزمه وبالكعب وف مناخيره اهم حاجه المناخير وجانب الدماغ يعنى مكان الصداع كده
والله يرحمه
قلبي عندك والله وربنا وحده اللى يعينك ويصبر قلبك انا اتعرضت لمواقف كتير عرفت فيها معنى ان الناس تتخلى عنك والشرطه زي قلتها من قبل الثوره وهم اللى اخترعو كلمه معلش واتاكدت من زمان ان مفيش حاجه اسمها شهامه وجدعنه الا من رحم ربي
هو انت نزلت ازاي محطة المرج وعملت المحضر في قسم سراي القبة هو انت بتحبي تتفرجي علي افلام هندي كتير ولا ايه ولا غاوية تعملي لنفسك قصص وخيالات مابلاش الاساليب السافلة بتاعتكم دي والقصص دي وكمان هو انت مش حافظة غير كلمة يا فاجرة من افلام عادل امام ولا ايه جاتكم القرف و لا حتي عارفة تكذبي وتكملي الكذبة تنزلي المرج وتعملي المحضر في سراي القبة يمكن المرج كان قسمها شكله قديم شوية قومت رجعت لحد سراي القبة شكله انضف ولا يمكن جنبه ميدان ولا حاجة حسبي الله ونعم الوكيل فيكم يا كذااااابة
ردحذفحمد لله على السلامة
ردحذفوربنا معاكى وتاخدى حقك
انا لو كنت معاكى كنت حوشت عنك وضربته بالجزمة هو والمتخلفات المنتقبات ...
اصبرى وكملى اللى بدأتى فيه لان فى غيرك بيحصل لهم كدا ومش بيعرفوا ياخدوا حقهم ولا حتى عندهم وسيلة ينشروا بها اللى حصل لهم
ياجماعه على فكره الموضوع مش جديد الثوره للاسف لم تغير شئ بل ع العكس انا هاحكي حكايه حصلت ليا قبل الثوره ف يوم من الايام جاتلي رسائل شتيمه بالفاظ بذيئه جدا ع الموبيل بتاعي ولاني محامي قلت لا ازاي انا لازم اخد حقي بالقانون رحت عملت محضر في مباحث التليفونات وتم معاينة الرسائل واثباتها بالساعه والتاريخ وتحد رقم الموبيل ثم تحويل المحضر للنيابه اللي تابع ليها (شفتم اللفه)طيب ما كنت عملتوا ف القسم اللي انا تابع ليه .المهم بعد متابعه للمحضر فوجئت انه اتحفظ قوم انا قلت ايه لا ازاي ماينفعش لازم اقدم تظلم للمحامي العام عشان يتفتح باب التحقيق ف المحضر ده لان سيادة وكيل النيابه كان المفروض يستعلم عن رقم الموبيل ويجيب صاحبه وينزله متهم بجريمة السب والقذف ههههههههه المهم اتقبل التظلم ورجع المحضر تاني عند نفس وكيل النيابه المذكور .مكدبش عليكم الصراحه حسيت باهتمام ف الاول لما عرفوا اني محامي وان المحضر جي من عند المحامي العام قوم ايه بعد سؤالي ومناقشتي من جانب وكيل النيابه حسيت انه مش مهتم مع انه وعدني انه هيتخذ الاجراءات اللازمه وانا كمان عرضت عليه مساعدتي باني اخد جواب من النيابه للاستعلام عن صاحب رقم الموبيل وسلمه بنفسي لكنه رفض وقالي انهم هما اللي هيعملوا كده قوم ايه انا اتثبت وصدقت ةبعد متابع فوجئت تاني بحفظه بدون اتخاذ اي اجراء وهنا خلصت الحكايه بعد مشوار ومجهود ووقت بلا فائده هكذا هى ثورتنا لقد بات ان اصاب بالاحباط ولكن املي ف الله انه سوف ينصر مصر وشعبها باذنه وعونه .
ردحذفالثوره كانت فى التحرير مش فى عقول البشر أنا بقيت أنكسف اقول أنى كنت فى التحرير الكل يجنى المكاسب وأنا أجنى قوت العيال وقال واحد الثوره يقوم بها الأغبياء ويجنى ثمارها الأذكياء هذا الكلام أتقلى بالحرف الواحد التكالب على السلطه وجنى الأرباح والشيوخ الذين يقولون دون فهم ودون علم وسماهم الرسول صلى الله عليه وسلم الرويبضه والمنقبات بقم عصبات وربنا يستر ومتزعليش كل واحد مننا أنكسر بس بطريقه مختلفه وم لم ينزل التحرير هو المستفيد ينتصر الجنود وينسب النصر للقاده رغم أن القائد يجلس فى المخبء والجندى يموت فى الميدان
ردحذفانا احب اقولك اني حصل معايا نفس الموقف ده الصبح في الشارع قدام الناس انا واخواتي البنات وهو في ولدين بيجروا ورانا في الشارع عايزين يتحرشوا بينا وبحدفزا علينا طوب واما مسكونا ضربونا قدام محلات في منطقه زحمه وقعونا علي الارض وبالشلاليط علي جسمنا واما في 2 بوابين عماره ست وبنتها مسكوهم وطلبنا البوليس البوليس قالنا انتم اللي هتتمرمتوا وكانوا بيعملونا بكل قله زوق علي الرغم من احنا طلبه كليات محترمه دي عيل صيع في الشارع سكان منطقه راقيه مش شعبيه وعلي الرغم من كده محصلش ليهم حاجه وروحوا بيتهم عشان ينزلوا تاني يوم يعملوا اللي عملوه تاني .
ردحذفربنا معانا احنا الشعب المصري اللي نسي اين الشهامه حتي تهدر كرامته يوم بعد اخر اشكرك علي جرائتك وانك شاركتينا معاكي موقفك
انا اول مرة ادخل عندك
ردحذفبس فعلا انتي مش متخيلة كمية الغضب اللي انا فيها
انا سلفي و ملتحي و بأقولك ان الكلب ده ملوش علاقة لا بالدين و لا بالسلفية و انتي بسهولة تقدري تاخدي حقك
ما أخذ بالقوة لا يسترد الا بالقوة
الاشكال دي بتلاقي هي دي لقمة عيشها و لو فوتي يومين تلاتة هتلاقيه موجود في نفس المكان يعني لو ركبتي المترو رحلة كاملة هتتكعبلي فيه بالتأكيد
يا اما اخوكي يتصرف و يتقبض عليه بشكل قانوني و انتي معاه
يا اما ياخد العلقة المعتبرة و يعرف ان الله حق بجد
ثم واضح انه احد كلاب الشرطة القدام زي ما قال لامين الشرطة فمعلش متزعليش و ان شاء الله اللي جاي احسن
خدى من ده كتييييييييييييير اوى لسه اللى زيه هاينتشرو ويتوغلو وهما اللى هايبقو الحكام والشرطه لاحول لها ولاقوولن تقوم لها قائمه استطعنا القضاء عليها الى الابد انتقامنا كان شديد شديد بدون اى حكمه واصبحت الشرطه كالاطفال تبحث عن من يرعاها والبلد قدمناها للاخوان والسلفيين هديه لست ضد الثوره بالعكس تماما ولكنى ضد تصرفات الثوار بعد الثوره وانتى بداتى كلامك بان اغلبيه الناس بعتقدو ان الثوره سبب الخراب وهذا خطانا لم نكسب الناس بل خسرناهم ولم يجدو امامهم الا اللحيه يتشبسون بها
ردحذفمعظم الناس بقت بتشوف حاجات زى دى وتقول وانا مالى ادخل نفسى فى خناقة او مشكلة لية ودى حاجة بتضيع من الشعب المصرى اللى كان معروف بالشهامة والجدعنة بس الايام شكلها بتضيع كل حاجة واقدر اقول ان نفسى مصر كلها تبقى السويس !!!
ردحذفكون إنه ضربك أو إستعمل الدين علشان يتهجم عليكى وإن الناس اللى حواليكى خذلوكى . كل ده ميعتبرش هزيمة ليكى . الهزيمة الحقيقية لحظة ما تسكتى وتقررى تدفنى راسك فى الرمل وتبقى واحدة من اللى بيسمعوا شتيمتهم باسم الدين بودنهم ويسكتوا
ردحذفهل هتستلمى وتنهزمى فعلا ؟ شخصيا .. مظنش
ابقى بصى على مدونتى :)
متزعليش مني أنا مش مصدق كلامك
ردحذفالشعب ده عظيم وعمره ما سكت عن ظلم
بالذات ركاب المترو لأنهم من الناس الغلابة الجدعان
كلامك ربما يكون غير منصف أو منفعل نوعا ما
راجعي نفسك القصة فعلا غير متوازنة بالمرة
لا أقصد أبدا أنك تكذبي ، ولكن ربما تكون هناك تفاصيل لم تذكريها وهي السبب في عدم تعاطف الناس معاكي
انا اسفة ليكي وعليكي و مش متخيلة نفسي مكانك بس لو دا حصل يمكن مكانتش تجيلي الشجاعة علي اني انزل و اكمل المشوار معاه لاني لا اثق في شرطي مهما جل شانه او صغر لاسباب شخصية متبعدش عن اللي شفتيه منهم المرة دي.
ردحذفمش في ايدي حاجة غير اني اعتذرلك عن نفسي .. ربنا يسلمك ويسلم طريق البلد ويهدينا جميعا
العيب مش فيكي لان الحق احق ان يتبع و دعوة المظلوم لا ترد و بكرة حقك يجيلك لحد عندك لان ربنا لا يسفط حق العبد ما دام العبد لم يسامح فيه
شعب متبلد وقليل الادب ..انا كنت عايشة ف جدة 5 سنين واول مرة انزل القاهرة علشان اعيش فيها من شهرين ..شفت قلة ادب ..راجل محترم وبية كدة وعينية ملونة وابيضانى ولابس نضارة تقولوش دكتور وطبعا انتوا عارفين ازمة الركن ف القاهرة ..ف شارع مصطفى النحاس سيبت العربية للسايس وعربيتوة كانت مركونة وانا وراة نزلت اشترى مياة من الكشك فلما لقيتوة جة ركبت العربية علشان اوسعلوة وقبل ما اركب لقيت وابل قذر وحقير من الشتايم ميخرجش ابدا من حد محترم..عملت مش واخدة بالى فدة اصر على التحرش بالكلام ..بيقولى انتى بكلمك انتى يا بنت كذا وكذا ..وهنا مقدرتش امسك نفسى وكانت اول مرة اشتم فيها وانهارت بجد ومبقتش مصدقة ان دة بيحصل ف مصر ...الشعب بقا قذر
ردحذفيا بنتى الثورة قام بها قلة قليلة و عمرنا مكنا أغلبية و الشعب المصرى لم يشارك فيها و كان فاكرها ماتش كورة لانه لم ينزل الشارع إلا لما حستى حمارك تخلى عن الحكم فاحتسبى عند الله ماحدث معك
ردحذفما حدث هو مجرد بروفة للقادم من الأيام ..... لك الله يا مصر
ردحذفللاسف معظم الناس دلوقتي بقوا باردين و باعو القضية كلها و رجعوا لعهد المخلوع للهيافة كلها من او و جديد
ردحذفأسماء .. متفهم جداً لغضبك وده حقك وإللي حصل ده أنا مش مصدق إن المصريين ممكن يشوفوا بنت بيحصل معاها كده ويسكتوا .. بس صدقيني في مصريين كتير مايرضوش حاجة زي دي تحصل ومايخلصهمش ابداً إن بنت زي أختهم أو بنتهم يحصل لها كده .. أما بخصوص الكلب ده فواضح إنه واخد على الصعود للمترو . يعني إنتي لو خدتي أخوكي وركبتي المترو في نفس التوقيت أكيد بإذن الله هتلاقيه وساعتها لازم يتقبض عليه بدون ضرب ولا إهانة وتجروه على الشرطة ولو ماعملوش حاجة يبقى تشيلي اسم المدونة دي وتغيريها لـ (إحنا بتوع المترو)
ردحذفما حدث بألأمس هو إشارة للثوار والثورة ان مصيرنا نحن الثوار في مصر التي تديرها عصابة المجلس العسكري وفتوات السلفيه ( دعاة دينهم دين العنف والموت ) لا ديننا الحنيف دين السماحة والحب .
ردحذففاصبحت مصر بين شقي الرحي بين مجلس عسكري ديكتاتوري او حكم رجعي يهود بنا لعصور الظلمات باسم الدين وما هو بالدين من شيئ ..
أحمد ناظم المحامي
تعليق قارئ : حقك ان ترضى بعبوديتك و لكن دعنى أحلم بحريتى
ردحذفمن حقك أن تعيش فى ذل ارتضيته ولكن دعنى أدافع عن عز أنشده
من حقك أن تتخذ من الرحيل و الهجرة خلاصا لكن دعنى أدافع من أجل وطن اتخذته
من حقك أن تعيش فى ظلمة الليل و لكن دعنى أحلم بنور الفجر .. نور الحرية
مالا يقتلك يقويكي, هتمر فترة الالم وهتحسي إنك اقوي. أنا بيجنني الستات اللي بتقبل يتقال عليها كلام زي اللي الرجل المتخلف ده اعد يقوله وهن واقفين زي البهايم ويقوللك عايزين نسمعه, الجهل تمكن من الناس للإسف والمرأة بقت هي نفسها حاسة إنها ولا حاجة,احييك وياريت فيه في مصر بنات كتير زيك
ردحذفالاتنين اللي اتمطعواوعملوا نفسهم ابو العريف مش مصدقين, طب إيه اللي هيخليها تكدب
ردحذفبصي يا اسماء المرة اللي جاية, صوريه وهو بيتكلم وحطيه علي اليوتيوب نضحك عليه شوية
طب اللي اسمه تيري وهو ابو العريف ومش اقول عامل نفسه ابو العريف يوضحلنا هو ازاي نزلت محطة المرج وودوها قسم سراي القبة تعمل محضر يعني هو المرج مافيهوش فسم ولا المطرية ولا الزيتون ولا عزبة النخل ولا عين شمس ولاهو اي كلام في اي كلام واهو منه نشتم شوية وخلاص وكمان حتي ولو كلامها صح وهو اكيد كذب ايه دخل الناس السلفيين والاخوان وميدان التحرير والسعودية في الكلام لما تقعد علي تويتر تشتم في السلفيين والاخوان هو اي حد بدقن يعمل مشكلة نشتم السلفيين والاخوان ولا هي تلكيكة للشتيمة وخلاص
ردحذفالله لمستعان ! . . .
ردحذفانا كنزو يا اسماء
ردحذفانا اسف للى حصلك جدا طبعا وياريتنى كنت معاكى لو كان ابويه اللى عمل كدا كنت وقفته عند حده بس للاسف الناس رجعت للسلبيه اكتر م الاول عاوزين ياخدوا بس ثمار الثورة هو ده اللى ف بالهم ومش ف بالهم ان طيور الظلام والتكفيرين الجدد بيرجعوا تانى لعصر الارهاب
انا بجد اسف للى حصلك واذا كان قدرك انك تركبى ف مترو كله للسيدات مش العربيه اللى كنتى فيها بس ف هنقول الحمدلله على كل حال وقدر ولطف
نخشي من الضياع بغد ان عبرنا الصعاب
ردحذفنخشي ان نهتف في اعماق النفس
الموت اصبح أمنية
والحياة كانت من جراح الاغنية
عيناي تسبحان في الشرود يومها
من يوم أن تحرك الفناء فوق كلّ أخضر
يا واحة الأمان أقفري
قد استبيحت الحرم
وسيقت النساء والأطفال للحمم
ليطعموا لوحشة الظلم
ليطفئوا ابتسامة الصغير
ليهتكوا قداسة الحرم
وضجّت الأصوات تستغيث ربها
في الليلة التي بكى بها الحصن من شهقة الدماء
وحملت رياحها بألف آه
الكون كله يقول: آه
اختى اسماء
ردحذفهذا الرجل ليس سلفى هو ليس له علاقه بالدين من قريب او بعيد - هذه ليست اخلاقنا
انا كبنت غضبانه جدا من اللى حصل لك وسادعمك فى اى وقفه او قرار ستتخذيه لكن الاسلاميين منه براءءءءءء
اختى حبيبتى الكثير الان من يريد زرع الفتنه فى البلد وليس كل من تحدث فى الدين يحسب علينا
انا اعتب والوم بشده السيدات هم فى نظرى بجد اشد جرما منه ولكنى لا اعلم ايضا باقى ملابسات الحادث
قلبى معك حبيبتى -اللى حصلك وربى يعلم واجعنى كانه حصل لى انا
الامضاء
بنت مصريه (نيفين خليل)
مش هقولك غير ان خيالك واسع
ردحذفوالراجل ده ملوش علاقة بالدين
انتى غلطي في حاجة واحدة ,,في المواقف اللى زي دي لازم تلبسية حاجة جامدة زي بيتحرش بيكي في عربية السيدات أو حاول يمد ايدة على جسمك أو حاول يسرق الموبايل ,, الظابط هايبقى مضطر يكتب محضر ,,و هو التاني هايحاول يدافع عن نفسة ,,, فالناس هاتقول انت كنت بتعمل اية في عربية السيدات ,, لكن ضربني دي ماتكولشس مع بهوات الشرطة ,,,و بعد كدة نبقى نشوف بقى مين لية حق عند التاني ,,يخش الحجز و بعد كدة نتفاهم
ردحذفم/ أحمد محمود
انافى البدايه مش ملتزم يعنى مش من الناس اللى مربين دقنهم ولابسين جلبيات قصيره وياريتنى اكون منهم بس تعرفى شكلك يتبالغى شويه لا بتبالغى خالص اصل مستحيل واحد هايبقى حامل فى صدره شيئ من كتاب الله ويعمل معاكى كدا مستحيل واى حد يكون عرف الاسلاميين دول عن قرب هايقول عليكى كدابه لان دى مش اخلاق اى حد بيتكلم باسم الدين دا لو مجنون مش هايعمل كدا وبعدين لو عمل كدا اكيد يبقى فيه حاجه حصلت منك ماقولتلناش عليه اقعدى مع نفسك وفكرى الافتراء على الناس شيئ لا يستهان به وتشويه صوره الاسلامين ليس بالامر الهين داين تدان
ردحذفيا جماعة أنا عايز أقول كلمة واحدة
ردحذفأحا
ما حدث مؤلم ومزعج وبعض التعليقات تدل على سخافة اصحابها وابتذالهم .موقف النساء في عربة المترو مخجل وكذا موقف معظم الرجال واكيد الموقف الاسوأ هو موقف الشرطة .
ردحذفان معظم الذكور وعدد لا بأس به من الاناث يصدقون الكلام الفارغ ان المراة غلطانة لمجرد خروجها من بيتهاوانها ضلع اعوج الى اخر هذه التفاهات وهو اختلاط النظرة الدونية للمرأة التي هي الام والزوجة والشقيقة بقشور من الجاهلية الدينية.
اجندة أجنبية ... تمويل خارجى ... بلطجية ... كافرة ...!
ردحذفهذا وصفك لنفسك وفى هذا الكفايه
حمدالله علي سلامتك يا اسماء
ردحذفواسف جدا علي حصلك مع اني معرفكيش
بس انشاء الله خير وحقك هيرجعلك انشاء الله
بجد شعب نسال له الشفاء و نسال الله السلامة حتى حوار الناس مع بعض اصبح يصيب بالغثيان
ردحذفبصي يا سمسمة طالما انك اجندة و تمويل و ساكنة جنب عمتي في المرج نبقي زمل
ردحذفحمدالله علي السلامة اولا
بوليس مين الي مستنية منه عدل و حماية دول بيخاوا من خيالهم حاليا
و لا تنتظري شيئا من ششعب المترو فهو نفس شعب القناة الاولي و الي ممكن يصدق قصة الكنتاكي الف مرة مش من كام يوم كا نازل يحمي الجيش
انتي كنتي تتعاملي معاك بالشلوت اولا
و بعدين تمشي الامور في مجراها و تلبسية قضية
تاني الف سلامة يا قمر و ما تعمليهاش حجة و ما تنزليش يوم الجمعة هانيجي ناخدك من البيت
الف سلامه عليكي يا توته وحمدله عاسلامه
ردحذفمن اول ما طلع كنت صوتى ولمتى عليه الناس لانه مجنون وطلع عربه الستات
ردحذفحمد اللة علي سلامتك يا اسماء
ردحذفانا صراحة بعد قرايتي لرسلتك الدنيا سسسسسسسودة في وشي يكفي اني فعلا بقيت اخاف اخرج من بيت
و لسة ياما حنشوف من جهابذة التخلف
اقول لك ايه غير اننا بلد باه التعريص فيها برخصة واللي ينطق بالحق مجنون ربنا يعين و يهون علينا في البلد و انا باقول الكلام ده غصب عني و عارفة اني ح اتشتم انما العيب ما كانش في الحكومة احنا شعب سلبي و متخاذل عن نصرة الحق و الظالم و المظلوم خليتيني عيطت لان بناتي ممكن يتعرضوا للي اتعرضيتي له و ما فيش راجل فيكي يا بلد ينصرهم و كنت باقول ان النسبة 30 في المية ططمنتيني انها 4 و ممكن تصفصف على اتنين في المية ي
ردحذفهي ده مصر مش اليوم لكن كل يوم وكل السنين إلا فاتت من عمرنا لكن ما في حد شايف مصر علي حقيقتها إلا بيخرج منها ويشوف الدنيا علي حقيقتها ويشوف النظام في باقي دول العالم واحترام حقوق الإنسان صدقيني إحنا في تراجع مستمر في مصر علي جميع المستويات عرفه ليه لأن أحنا بنتكلم كتير أكتر ما بنشتغل وأكثر شعبنا من الجهلاء حتي المتعلم الجاهل بيأثر عليه.. وأخيراً ألف مليون سلامة عليكي يا اسماء
ردحذفأولا حمدا لله على سلامتك يا اسماء
ردحذفالمشكلة أن الحكومة والمصطبة العسكرية عاجبهم الى بيحصل وقاعدين يشيدوا بوزير الداخلية وكأن الأمن ميه ميه.
مفيش حد بقا بيحاسب المخطأ وكل واحد بيعمل ما بداله.. الحكومة والمصبطة بيضيعوا هيبة الدولة.. وشريعة البلطجة بدأت تسود.. والقوي ياكل الضعيف.. لكني حزين لموقف الشباب الى في المترو ويا حسرتاه على أيام الثورة.
طبعا الكل عمال يطبطب عليكى وبدون سماع الطرف الثانى
ردحذفكالعاده طبعا بدقن يبقى غلطان وابوه غلطان
بدون النظر الى ان اسلوبك قذر فى الكلام وطريقة الاعتراض ده غير ان نص الحكايه متفبرك وكان ملاك بيتعارك مع شيطان "سؤال مش ممكن محدش إدخل من 100 دكر علشان النتايه هى اللى غلطانه " كرهت كلمة ناشطه وناشط بسبب تصرفاتكم التوقيع
دكر ياست
أسماء أنا في حالة غضب جنوني لما تعرضتي له من عنف و قبح و جهل و لا مبالاة شعب (طبعا مش كلهم، لكن بما كان فيهم من نساء كالجاريات يعشعش عقلهم العناكب و الجهل المدمر) و نظام فاسد يصمم على إفساد مرحلة النقاهة التي حتى لم تبدأ. مجتمعنا مريض مرض سرطاني و تتفجر أعراض هذا المرض بكل قبح و جبروت من قبل الثورة الكريمة - و لكن رغم افتقاري إلى ما أقدمه غير الكلمات، إلى أني متأكدة أن شجاعتك و ما تعرضتي له من إساءة لن يمر مر الكرام، و سيكون له دور في تحريك النقاش المتأخر على وضع و حقوق و المنظور إلى المرأة في مجتمعنا و الفهم العام للدين- و ربما أيضا يؤدي هذا إلى التفكير في قيم المجتمع التي يتم استغلها دائما و من ثم سيادة الظلم و التأخر. سأكتب إلى أحمد الطيب شيخ الأزهر وعلينا أن نضغط من أجل حملة تنوير المجتمع على دور و حقوق المرأة من منظور ديني و مدني. التغير لازم يكن في عقول الناس لأن حتى لو تغير النظام و لكن الناس هما الناس، لن يتغير شيء. فخورة بشجعتيك.
ردحذفياأسماء ... أقسم لك بالله أن ماحدث معك أدمى قلبى .. عليك أولا .. وعلى مصــــــــــر ثانيا .. وأقول لكلاب مجلس قيادة الزير والراعى الرسمى للثورة المضادة ... ولنساء الداخلية القابعين تحت السرير ولوزيرهم الفاشل ... ولكل من تقاعس عن نصرتك ونصرة أى مظلوم .... والله لتموتن كما تنامون ... ولتبعثن كما تستيقظون ... وإنها للجنة أبدا أو النار أبدا ... ولانامت أعين الجبناء .
ردحذفالبلاء الوهابى البدوى الذى يجتمع حوله الفاشست والسفاحين والبلطجيه ويجب استعمال القانون مع الجميع وكل من تسول له نفسه التعرض لاى مواطن ولو كان عنده 100 عام وذقنه 50 متر فاليذهبوا لمكنهم الطبيعى اذا انتهكوا خصوصيه الناس السجون
ردحذفالدعوة بالحسنى ولايمكن ان يكون داعيا ويسب ويشتم ولو كنت فظا غليظ القلب لانفضوا من حولك ولكنى استغرب ان احدا لم تاخذه نخوة ومنعه عنك واعتقد ان التراخى الامنى والذى كتب احد كلاب مبارك ان الثوار كسروه نحن كسرنا الطغيان وهناك فرق بين الطغيان والامن بلا اطالة عليكى لايمكن ان يكون هذا الرجل داعية انما رجل مخبول وارجو ان تطيب نفسك وتهداى واعلمى ان الشعب المصرى يستنكر تلك الفعلة القبيحة!
ردحذفارفعى راسك فوق يا اسماء هى دى ضريبة الثورة والحرية ولازم كلنا ندفعها علشان اولادنا وربنا هيحمى مصر من هؤلاء الجهلاء
ردحذفما حدث لي لم اراه بالنطاق الضيق الذى رآه به البعض فليست المشكلة الكبرى فى هذا المعتوه انما فيمن تلقوا كلامه وصدقوه وهو كلام ينفر منه المسلم الحق فما بالك فالمسيحيات الاتى كن يسمعنه وهم فى نفس الوقت يرون المتأسلمات متجاوبات ومعجبات بما يلقنهن من توبيخ واهانة باسم الدين ... ايضا هذا يعكس العقيدة الاجتماعية السلبية التى اتبعها كل رآنى اصرخ واضرب واهان وقرر انه لا عقاب ولا جزاء لمن اخطأ بحجة ان المخطئ كان يتحدث باسم الدين ايا كان هذا الحديث صححيحا ام باطلا وانه رجل كبير فى السن ولا بد الا يهان داخل القسم والذى زاد الطين بلة انهم يرون ان تطبيق القانون عليه غير مجدى .. تلك السلبية التى رايتها فى عيون الجميع باستثاء الشابة التى بلغت 19 عاما ووقفت بجوارى ... تلك هى الطامة الكبرى التى عطلت ثورتنا وتعمل على تدميها الآن ... ولكن هيهات من الهزيمة ... فنحن الثولر صامدون حتى القضاء على من يقضون على ثورتنا بالسلبية ... فبحق دماء الشهداء التى حملتها لن اتنحى عن طريقى مهما كانت المعركة شاقة فالنصر ليس بمستحيل ... آت لا محالة
ردحذفمش أخوكي وكيل نيابة أكيد إنتي من علية القوم الذين كرهو الثورة منذ بدايتها و يكرهون نجاحها و لم و لن تكونوا يوما من الأيام ثائرين حيث أنكم واخدين حقكم تالت و متلت هتثوروا ليه و طبعا يهمكم عودة الحال إلى ما كانت عليه قبل الثورة و ترجعوا تركبوا الناس تاني و هذه القصة إعداد و سيناريو و إخراج فلول الحزب الوطني الي إنتي منهم بالطبع و الهدف من القصة تكفير الناس بالثورة و ندمهم على قيامها حتى يعود نسخة مكررة أخرى للحزب المنحل و أعتقد أن هذا لم و لن يحدث إن شاء الله حتى لو القصة حقيقية ما كان لكي فعل ذلك إلا إذا كان أخوكي وكيل نيابة و تعلمي أنه لن يجرؤ أحد من رجال الشرطة المساس بكي وأكيد لكي أيضا رتب بالشرطةيعني محمية من كل الجهات بطلوا تكفير الناس بالثورة فدولة الظلم ساعة و دولة الحق إلى قيام الساعةو لو فكرتي شوية بتأني لوجدتي إن الثورة في صالح الجميع عودي إلى رشدك و اعترفي بذنبك و قولى الحقيقة و بطلي ضلال و إضلال حسبنا الله ونعم الوكيل.
ردحذفأخوكي وكيل نيابة أكيد إنتي من علية القوم الذين كرهو الثورة منذ بدايتها و يكرهون نجاحها و لم و لن تكونوا يوما من الأيام ثائرين حيث أنكم واخدين حقكم تالت و متلت هتثوروا ليه و طبعا يهمكم عودة الحال إلى ما كانت عليه قبل الثورة و ترجعوا تركبوا الناس تاني و هذه القصة إعداد و سيناريو و إخراج فلول الحزب الوطني الي إنتي منهم بالطبع و الهدف من القصة تكفير الناس بالثورة و ندمهم على قيامها حتى يعود نسخة مكررة أخرى للحزب المنحل و أعتقد أن هذا لم و لن يحدث إن شاء الله حتى لو القصة حقيقية ما كان لكي فعل ذلك إلا إذا كان أخوكي وكيل نيابة و تعلمي أنه لن يجرؤ أحد من رجال الشرطة المساس بكي وأكيد لكي أيضا رتب بالشرطةيعني محمية من كل الجهات بطلوا تكفير الناس بالثورة فدولة الظلم ساعة و دولة الحق إلى قيام الساعةو لو فكرتي شوية بتأني لوجدتي إن الثورة في صالح الجميع عودي إلى رشدك و اعترفي بذنبك و قولى الحقيقة و بطلي ضلال و إضلال حسبنا الله ونعم الوكيل.
ردحذفتستاهلي
ردحذفالسلبية والجهل والتدين المظهرى اعداء لابد من مواجهتهم فى الفترة القادمة ... احنا الشباب لازم يكون لينا دور فى تغيير فكر الناس ،،، من كتر التنبلة والتناحة والسلبية الناس خلاص نسيت حاجة اسمها رجولة وشهامة ... ثقافة المجتمع ثقافة عدوانية نتيجة شيوخ الجهل والتكفير ارباب المخلوع ونظامه ..... مش عارف اقولك ايه غير (أسسسسسسف)
ردحذفان لم تستحى فافعل ما شئت
ردحذفلما توصل قلة النخوة بالشكل ده يبقا ربنا يتولانا برحمته
كأستاذ جامعي، أكره دائما بناء أستناجات على افتراضات خاطئة. انتي غلطانة في الموقف ده من ساسك لراسك:
ردحذف(1) منين جبتي فرضية أنك من تناقشي راجل بدقن و طبعا زبيبة ؟ الفرض الخاطئ ده هو اللى خلاكي تتضربي. طالما بدقن يبقى منزه عن الخطأ و كل اللى بيعمله و بيقوله صح و لازم تسمعيه.
(2) برضه، منين جبتي فرضية أن الشرطة لحماية المواطنين دي؟ الشرطة المصرية موش لكدة ألا قلة مندسة من الضباط هية اللى غلطانة و فاكرة أن شغلتها حماية المواطنين.
(3) الفرض الغريب التالت، مين اللي قال أن اللي بيركبوا في العربية المخصصة للرجال هما فعلا نوعهم كده على وجه الحصر؟
بصراحة، عندك فروض كتير غلط....لو مقدمة لماجستير كان زمانك سقطتى
بعد قرأتي لكل التعليقات حول مقال الكاتب وائل قنديل لم اجد تعليقا واحد يدين ركوب الرجل في عربة النساء مهما كان سنة . عربة النساء هي حرمهن الذي استباحه الرجل .كان عليه ان يدعو الي ما يدعو له في عربة الرجال ... ان الخوف واضح وظاهر من قوة النساء الانتخابية حيث انهم يستطعن قلب موازين التيارات المترشحة للمجالس النيابية لو انهم تحيزن لبنات جنسهم او تحيزن لتيار من التيارات السياسية المنتشرة بكثرة علي الساحة الامر الذي لفت نظر السلفيين الي تلك القوة الانتخابية لهن فسارع مضطر الي ترشيح بعضهن علي بعض المقاعد وهو الذي يتخذ من المرأة موقفا غير مبرر بانهن ناقصات عقل ودين وان مكانهن الطبيعي هو البيت ومنه الي القبر . ان عربة النساء لا يجوز لمسلم ان يركب بها او يدخلها تحت اي سبب من الاسباب .ان الشيخ الذي دخل الي العربة يناقض نفسه . هل في الاسلام ما يبيح لشخص اما ان يقتحم حرمة مكان مخصص للنساء . كيف يكون مسلما متشددا ثم يقتحم علي النساء خلوتهن .. الفتاة التي اعترضته فتاة ازهرية لديها من المعرفة الدينية الكثير . بصرف النظر عن انها ناشطة او غير ناشطة . ولكن الغريب ان باقي النساء عزفن عن التصدي له مع انهم يركبون تلك العربات تجنبا للرجال في حين تجد كثير من النساء يركبن في عربات الرجال ومن الممكن ان نطلق عليهن انهن متحررات بالنسبة للاخريات راكي عربة النساء . كما ان تقاعس الشرطة صار عادة واظن انه بقي علينا ان نرفع اهتمامنا برجال الشرطة لتقاعسهم عن اداء العمل وقد بدأ الكثيرون يستعدون لذلك بل بدء كثيرون ياخذون حقهم بأيدهم . فهم قد تفرغوا للمظاهرات والمطالبة بالحوافز والمميزات دون ان يقدموا عملا للمجتمع مقابل ما يطلبونه .وهم ليسوا كضباط القوات المسلحة الذين استعادوا كرامتهم سريع لان القبضة القوية كانت موجودة وقتها ..
ردحذفالاخت اسماء طبعا الله لان يرتضى ما حصل لك
ردحذفوربنا هياخد حقك وهوة الان مرمى فى المستشفى نتيجة لى اعتداء قام به مسلحون عليه
الف سلامه عليكى وبلغى الاستاذ وليد تحياتى
احمد بدر
قلوبنا معك , وان كنا نتمنى ان نساعد فى الحصول على حقك ولكن لا نعرف كيف , أرجوا أن لاتيأسى من الشعب ومن السيئات , قدرنا أن نحمل قذارات 30 عاما ونتخلص منها
ردحذفدمتى على شجاعتك وجراءتك
اسماء قبل اى كلام احب ان اقول لكى انك وحشتين جدا جدا وعايزه اقول لكى هو ده الجهل فى كل حاجه فى حايتنافى ( الدين - الثقافه- سماع وجهات نظر الأخرين وكيفية التعامل معهم) وعلى فكره ياجماعه اسماء دى كانت اول بنت نزلت التحرير على الرغم ان اخوها وكيل نيابه يعنى ماكنتشى بتكره الثوره زى بعض الناس كانو بيقولو وربنا معاكى ياسماء .
ردحذف